Сот департаменти журналист кабылган окуя боюнча маалымат берди

Жогорку Сотко караштуу Сот департаменти 2-майда Бишкек шаардык сотунда журналист кабылган окуя боюнча комментарий берди.

Мекеме тараткан маалыматта кабарчы конвойдун имараттын короосунда турган унаасын видеого тартып, башкаларга тоскоолдук жаратканы, соттун тартип сакчыларына кыйкырып, чыр чыгарганы айтылды.

"Тийиштүү кызматкерлерден рапорт алынды, тарап жаткан видео материал жана документтер иликтенип жатат. Бул окуя боюнча кызматтык териштирүү жүргүзүлөт”, - деп белгилешти Сот департаментинен.

Окуяга күбө болгон журналисттер Govori TV'нын ал кабарчысы эч кимге тоскоолдук жаратпаганын, чырга себепкер болбогонун жазып чыгышты.

Бүгүн, 2-майда Govori TV агенттигинин кабарчысы Гулназ Мидин кызы Кемпир-Абад маселеси боюнча кармалгандардын сотуна даярданып, жабдыктарын орнотуп жаткан учурда аны сот залындагы тартип сакчылары күч колдонуп, эч себепсиз эшикке чыгарып салышканын билдирген. Окуядан соң журналист сот аткаруучуларга карата чара көрүү арыз менен милицияга жана сот департаментине кайрылган.