Бишкекте ден соолугунун мүмкүнчүлүгү чектелген жарандардын ыңгайлуулугу үчүн шарттар түзүлөт

«Бишкекасфальтсервис» муниципалдык ишканасы тарабынан реабилитациялык борбордун аймагында, тагыраак айтканда Киев жана Шопоков көчөсү менен кесилишине унаа токтотуучу жайлар уюштурулду. Бул тууралуу мэриянын басма сөз кызматы кабарлады.

Унаа токтотуучу жайлар 3 унаага ылайыкталып, 89 метр ысыкпластик менен жол сызыктары чийилди.

ГОСТко ылайык, жакынкы күндөрү 6.4 «Токтоочу жай (паркинг)» жана 8.17 «Майыптар» белгиси менен бириккен 3 даанадан жол белгилери орнотулат.

"Буга чейин реабилитациялык борбордун жанындагы унаа токтотуучу жайга жөнөкөй жарандар унааларын токтотуп, ал эми майыптыгы бар балдары менен ата-энелер унааларын алыс таштап, борборго жетүүгө аргасыз болгондуктан майып балдардын ата-энелери унаа токтотуучу жайды уюштуруп берүү боюнча кайрылышкан", - деп билдиришти мэриядан.

Эске салсак, «Бирге ден соолук» коомдук фондунун алдындагы «Нур+» реабилитациялык борбору Киев көчөсүндөгү Республикалык диагностикалык борбордун 4-кабатында жайгашкан.