Анкарада Орусия менен Украинанын өкүлдөрү мушташты

Анкарада Орусия менен Украинанын өкүлдөрү мушташты. Мындай көрүнүш Кара деңиз Экономикалык Кызматташтык Уюмунун парламенттик ассамблеясынын саммитинде орун алган. Окуянын видеосу социалдык тармактарга жүктөлдү.

Белгилүү болгондой, мушташ "60 мүнөт" программасынын эфиринде болгон. Анда Мамлекеттик Думанын депутаты Ольга Тимофеева комментарий берип жаткан.

Капысынан анын артынан Украинадан келген эл депутаты Александр Мариковский пайда болуп, желекти кармап, Украинаны колдогон ураандарды кыйкырган.

Ал эми Орусия парламентинин эл аралык бөлүмүнүн кызматкери желекти жулуп алып, басып кеткен. Артынан барган Украинанын депутаты Орусиянын өкүлүн муштап жиберген.

Кара деңиз Экономикалык Кызматташтык Уюмунун парламенттик ассамблеясы 1993-жылы түзүлгөн. Ага Азербайжан, Албания, Армения, Болгария, Греция, Грузия, Молдова, Орусия, Румыния, Түндүк Македония, Сербия, Түркия, Украина мамлекеттери мүчө болуп кирген.