Өлкөдө электр энергиясынын тарифи жыл сайын өзгөрүп турары айтылды

Өлкөдө электр энергиясынын тарифи жыл сайын өзгөрүп турат. Бул тууралуу "Улуттук энергохолдинг" мекемесинин жетекчиси Талайбек Байгазиев брифингде билдирди.

"Быйыл электр жарыгына болгон тариф (мурункусу 700 кВт'га чейин 0,77 тыйын) 23 тыйынга жогорулады. 700 кВт'тан жогору мурункудай эле 2 сом 16 тыйын бойдон калат. Аркы жылдары электр жарыгына көп кымбаттуу болбойт, бирок инфляцияга жараша болот. Мисалы, 1 сомдук тарифке 10 пайыз болсо, 10 тыйын кошулат. Муну инфлекциянын индексине байлайбыз.

Бул каражатка энергетика тармагында реконструкция, жаңы жабдыктарды алып келип монтаж кылуу жумуштарына жумшалат. Көп жылдан бери тариф саясатына көңүл бурулбай, тариф көбөйсө эл көтөрүлөт, төңкөрүш болот деп мурунку жетекчилер коркуп, тарифти кармап келген. Энергосектор ушунун туткуну болуп калган. Суунун, жол кире, таштандынын баасындай эле бул дагы көтөрүлүшү керек" деди ал.

Белгилей кетсек, 2023-жылдын 1-майынан тарта калк үчүн электр энергиясынын баасы (мурункусу 0,77 тыйын) 23 тыйынга жогорулап, 1 сомду түзгөн.