Гүлжигит Алыкуловдун мурдагы командалашы өтө оор абалда ооруканага түштү

Алматы шаарынын "Кайрат" клубунун оюнчусу Арсен Буранчиев "Актөбө" клубуна каршы оюнда оор жаракат алып, ооруканага түштү.

Ал "Актөбө" клубунун оюнчусу менен кагылышып, оюн талаасында эс-учун жоготкон.

"Арсен Буранчиевге операция жасалды. Топ үчүн күрөштө оюнчубуз оор жаракат алып, тез арада ооруканага жеткирилген. Учурда Арсен жандандыруу бөлүмүндө. Анын абалы өтө оор деп бааланууда. Ал күнү-түнү дарыгерлердин көзөмөлүндө. "Кайрат" клубунун жана Казакстандын футбол федерациясынын жетекчилери ооруканада жана керектүү жардамдарды көрсөтүүдө. Арсенге кабатыр болуп, тезирээк сакайып кетишин каалайбыз!", - деп Алматы клубунун басма сөз кызматы расмий билдирүү жасады.

Белгилей кетсек, Арсен Буранчиев кыргыз футболчусу Гүлжигит Алыкуловдун мурдагы командалашы. Гүлжигит Алыкулов "Кайрат" клубунан ушул жылдын май айында кеткен.