Өзбекстанда күйөөсү аялынан өч алуу үчүн уктап жаткан балдарын муунтуп өлтүрдү

Коңшу Өзбекстандын Самарканд облусунда эркек киши аялынан өч алуу максатында эки уулун муунтуп өлтүрдү. Бул тууралуу Өзбекстандын жергиликтүү басылмалары жазышты.

Маалыматка ылайык, каргашалуу окуя Тайлак районунда болгон. Анда 16-майдан 17-майга караган түнү 39 жаштагы жаран Орусияда иштеп жүргөн жубайынын башка эркектер менен кат алышып жүргөн сүрөттөрүн (скриншот) көргөн.

Мындан улам ал аялынан өч алууну чечип, уктап жаткан 6 жана 8 жаштагы эки уулун муунтуп өлтүргөн. Андан кийин ал укук коргоо кызматкерлерине багынып берген.

Учурда ал камакта.

Бул факты боюнча Өзбекстандын кылмыш-жаза кодексинин 97-беренесинин 2-бөлүгү (Атайылап киши өлтүрүү) менен кылмыш иши козголуп, тергөө амалдары жүрүп жатат.