Бишкекте лифтте камалып калган карыя каза болду

Бишкекте лифтте камалып калган карыя каза болду. Бул тууралуу SUPER.KG порталына "Бишкек лифт" ишканасы билдирди.

Ишкананын маалыматына караганда, лифт электр энергиясы өчүп калгандыктан токтоп калган.

"Электр жарыгынын авариялык өчүрүлүшүнө байланыштуу лифт токтоп калган. Лифт оңдоочу кызматкер 10 мүнөттө келип, жүргүнчүнү эвакуациялап, "Тез жардам" кызматын, кошуна жана туугандарын чакырган. Туугандары келген учурда карыя түрүү болчу. "Тез жардам" кызматы бир саатта келип, анын каза болуп калганын аныкташкан. Маркумдун туугандары анын улгайган жана көптөн бери жүрөк оорусунан жабыркап келгенин айтышып, соттук-медициналык экспертизадан баш тартышкан. Алардын лифттин иштешине эч кандай дооматы жок", - деп айтылат маалыматта.

Белгилей кетсек, маркумдун туугандарынын жазуу түрүндөгү баш тартуусу Октябрь РИИБине өткөрүлүп берилген.