Чүйдөгү мектепте көлчүктүн сууларын стакан менен тазалап жаткан окуучулардын видеосу тарады (видео)

Интернетте мектептин айланасындагы көлчүктөгү сууну стакан менен тазалап жаткан окуучулардын видеосу тарады. Андагы маалыматтарга караганда, окуя Чүй облусунун Ивановка айылындагы №1 мектепте орун алган.

Социалдык тармактарга тараган маалыматта окуучулардын биринин апасы төмөнкүлөрдү билдирген: "саат 09:38де билим берүү мекемесине келип, балдардын мектеп формасында көлчүктөрдөн сууну чакага куюп жаткан учурун видеого өзүм тартып алгам. Балдардын айтымында, алар саат 08:00дөн баштап көлчүктөрдөгү сууну чакага куюп, тазалап жатышкан. Ал жерде директор жок болчу. Мектептин директорунун орун басарына барсам, ал да билбейт экен. Социалдык кызматкер менен сүйлөшкөндөн кийин балдардын көлчүктөрдү тазалоосун ал айтканы белгилүү болду", - деп жазган ал.

Билим берүү министрлигинен бул маалымат такталып жатканын билдиришти.