Казакстанда вебкам-студия ачкан 24 жаштагы кыргызстандык жигит 12 жылга соттолду 

Казакстанда реалдуу убакыт режиминде интернет аркылуу порнография таратуу менен алектенген трансулуттук уюшкан кылмыштуу топтун уюштуруучусу 12 жылга соттолду. Бул тууралуу Казакстандын полициясы маалымдайт.

"Биринчи вебкам-студия 2021-жылы июлда табылып, 5 кыргыз, 5 казак жараны кармалган. Алардан 44 миң долларга жакын акча, Алматыдагы кыймылсыз мүлктөрү жана баңгизаты алынган", - деп айтылат маалыматта.

Маалым болгондой, ири шаарларда ижарага алынган батирлерде ондон ашык вебкам-студия иштеп, чет өлкөлүк кардарлар менен баарлашууга котормочу-операторлор тартылган. Анда 50гө жакын кыз иштеп, анын ичинде эки кыздын жашы жете электиги аныкталган.

Тергөөнүн маалыматына караганда, жумуш берүүчүлөр негизинен аз камсыз болгон үй-бүлөдөн чыккан, сырткы келбети жагымдуу кыздарга жогорку маяна убада кылуу менен жумушка чакырып жүрүшкөн.

2022-жылдын май айында тергөөчүлөр ишти айыптоо корутундусу менен сотко жөнөтүшкөн. Ал эми сот кылмыш ишинин материалдарын иликтеп чыгып, апрель айынын аягында айыпталуучуларга өкүм чыгарган.

"Трансулуттук топту уюштуруп, жетектеген 25 жаштагы кыргызстандык А.Ш. үй-мүлкүн конфискациялоо менен 12 жылга эркинен ажыратылды. Ал эми калгандары үч жылдан жети жылга чейин эркинен ажыратылды", - деп жазылат маалыматта.