Эрдоган Түркиядагы дээрлик бардык министрлерди алмаштырды

Түркиянын президенти Режеп Тайып Эрдоган кайра шайлангандан кийин жаңы министрлер кабинетинин курамын жарыялады. Бул тууралуу түрк маалымат каражаттары жазышты.

Эрдоган Анкарадагы пресс-конференцияда: "Түрк кылымында максаттарыбызга жетүү үчүн биргелешип иштей турган жаңы министрлер кабинетин сиздерге сунуштайм", - деген.

Эрдогандын жаңы өкмөтүндө 17 министрдин экөө гана өз ордун сактап калды. Алар саламаттыкты сактоо министри Фахреттин Кожа жана маданият жана туризм министри Мехмет Нури Эрсой. Калган министрлердин бардыгы алмашты.

Кечээ, 3-июнда Режеп Тайып Эрдоган Түркиянын президенти кызматына расмий киришти. Инаугурация аземи Анкарадагы президенттин резиденциясында өттү. Өткөн жекшембиде Эрдоган президенттик шайлоонун экинчи айлампасында 52 пайыздан ашык добуш менен жеңишке жетишкен.