Бишкекте жүк ташуучу унааларга чектөөлөр киргизилди

Бишкекте 1-июндан тарта жүк ташуучу унааларга чектөөлөр киргизилди. Бул тууралуу калаа бийлигинен кабарлашты.

Маалыматка ылайык, ушул жылдын 1-июнунан 1-сентябрына чейин абанын температурасы 28 градуска жеткенде жана андан жогору болгондо жүк ташуучу унаалардын жүрүшүнө чектөө киргизилет.

"Салмагы 18 тоннадан ашкан оор жана чоң габариттүү унаалардын жүрүшүнө убактылуу тыюу салынды. Тиешелүү уруксаттардын негизинде адамдарды, гуманитардык жардамдарды, көлөмдүү жана атайын жүктөрдү ташыган унааларга чектөөлөр киргизилбейт", - деп жазылат маалыматта.

Ага кошумчалай, "Бишкекасфальтсервис" муниципалдык ишканасы Жол кыймылынын коопсуздугун камсыздоо башкы башкармалыгы менен биргеликте шаардын айланасына кошумча жол белгилерин орнотушат.