Бишкекте коомдук транспорттор текшерилди

Бишкек шаарында коомдук транспорттор текшерүүдөн өттү. Бул тууралуу калаа мэриясынан кабарлашты.

Маалыматка ылайык, рейдди Транспорт жана жол-транспорттук инфратүзүмдү өнүктүрүү департаменти Бишкектин кайгуул кызмат башкармалыгы менен биргеликте өткөрдү.

Анда муниципалдык ишканалардын жана менчик ташуучу фирмалардын жетекчилери менен биргеликте аялдамаларда жүргүнчүлөрдү отургузуу жана түшүрүү эрежелеринин сакталышын, кыймылдуу курамдын техникалык абалын, санитардык нормалар текшерилди.

Белгилей кетсек, коомдук транспорттогу навигация системасы уруксатсыз өчүрүлсө, айдоочулар ишке киргизилбей калат.

"Мындан тышкары, шаардыктар менен иш жүргүзүлүп, аларга аялдамалардагы жүрүм-турум эрежелери да түшүндүрүлдү. Бишкек шаардык ички иштер башкы башкармалыгы боюнча МККБнын кызматкерлери аялдамаларда токтоп турган унаалардын айдоочуларына алар токтотуу эрежесин бузуп жатканын түшүндүрүштү. Биргелешкен иш-чаралар жол тыгындарынын жана кырсыктардын алдын алууга багытталган", - деп билдирди мекемеден.