Депутат: "Соттор, уят да! 2300 сом уурдаганы үчүн СИЗОдо төрөгөн аялды көрдүм"

Кыргызстандагы судьяларга пенсия бербей койсо деле болот. Мындай пикирин Жогорку Кеңештин Конституциялык мыйзамдар, мамлекеттик түзүлүш, сот укук маселелер боюнча комитетиинин жыйынында депутат Жусупбек Коргонбай уулу айтты.

"Ачыгын айтканда бул сотторго пенсия бербей койсок деле болчудай. Мен кечээ Степноедеги аялдардын колониясына барып, абактагы кыз-келиндер менен жекеме-жеке сүйлөштүм. Менин колумда акыркы алты айдагы абактан шарттуу бошотулгандардын тизмеси бар", - деди ал.

Жусупбек Коргонбай уулу оор кылмыш кылгандардын тизмесин атап, алар шарттуу бошотулганын айтты.

"Ал эми 2300 сом уурдап, 6 жылдан бери абактан чыга албай жаткан кыз-келиндер менен сүйлөштүм. Ар бир жылды азайтыш үчүн Аламүдүн райондук сотунда 2000 доллардан 4000 миң долларга чейин ставка бар экен. Мына сотторго пенсия. Кадимкидей базар.

2300 сом уурдап, СИЗОдо төрөп, балдарын кучактап отурган энелерди көрдүм. Соттор, уят да! Анан бул жерде пенсиясын талкуулайбыз", - деди Жусупбек Коргонбай уулу.