Бишкек шаарын өнүктүрүүнүн негизги долбоорлору талкууланды

Бишкек шаарынын мэринин биринчи орун басары Мирланбек Байгончоков Бельгиянын Кыргызстандагы элчиси Анри Вантигем менен жолугушту. Бул тууралуу мэриянын маалымат кызматы билдирди.

Маалыматка ылайык, жолугушууда Бишкек шаарын жакынкы жылдарда өнүктүрүүнүн негизги долбоорлорун жана пландарын, ошондой эле биргелешкен долбоорлорду өнүктүрүү боюнча өз ара мүмкүнчүлүктөрдү жана келечектүү тармактарды талкуулашты.

"Анда транспорт жана инженердик тармактарын өнүктүрүү жана модернизациялоо үчүн энергияны үнөмдөө, натыйжалуулугун жогорулатуу үчүн акылдуу технологияларды киргизүү тууралуу сөз болду. Мындан тышкары ар кандай инфраструктуралык долбоорлорду ишке ашыруу маселелери козголду", - деп билдирди мекемеден.

Белгилей кетсек, жолугушууга Валлон экспорт жана чет элдик инвестициялар агенттигинин директору Ричард Ив, соода боюнча кеңешчиси Айжан Мусаканова, Бельгиянын Бишкектеги ардактуу консулу Лоренц, юридикалык фирмасынын өнөктөшү Чынара Есенгелдиева, Фламанддын аймактык менеджери Барт ван ден Босх катышты.