Кыргызстанда алгачкы "Мекен-карта" тапшырылды

Бүгүн, 12-июнда Cанариптик өнүктүрүү министри Талантбек Иманов Орусиянын жараны Исанбек к. Ж. аттуу жаранга биринчи «Мекен-картаны» тапшырды. Бул тууралуу аталган министрликтин сайтында жарыяланды.

Маалым болгондой, Исанбек к. Ж.нын ата-энеси Кыргызстандын жарандары болушат.

Белгилей кетсек, «Мекен-карта» долбоору мурда өлкөнүн жарандары болгон чет элдик жарандарга, алардын балдарына жана неберелерине мекендеш статусун алууга, өлкөдө калуу үчүн бардык артыкчылыктардан пайдаланууга мүмкүнчүлүк берет. Болгону аталган жарандар шайлоодо добуш берүү укугуна ээ боло алышпайт.

“Мекен-картанын” ээлери өлкө аймагынан визасыз кете алат/кире алат, транзит менен өтө алат, мамлекеттик жана муниципалдык кызматтардан сырткары саламаттыкты сактоо жана билим берүү тармагында Кыргызстандын жарандары менен бирдей акы төлөнүүчү кызматтарда иштей алышат.

Эске салсак, "Мекен-картаны" алуу үчүн документтерди кабыл алуу өлкөнүн чет мамлекеттердеги пасспорттоштуруу бөлүмдөрүндө, дипломатиялык өкүлчүлүктөрдө, Калкты каттоо департаментинин алдындагы аймактар аралык бөлүмдөрүндө жүргүзүлөт.