Өлкөдө желим баштыктарга мыйзам менен тыюу салуу сунушталды

Жогорку Кеңештин Бюджет, экономикалык жана фискалдык саясат боюнча комитети бүгүнкү, 12-июндагы отурумунда "Кыргызстандын аймагында желим баштыктарды жүгүртүүнү чектөө жөнүндө" мыйзам долбоорун экинчи окууда колдоду.

Жыйындын жүрүшүндө мыйзам долбоору боюнча депутат Марлен Маматалиев маалымат берди. Ал белгилегендей, полимердик материалдардын ден соолукка жана айлана-чөйрөгө зыяндуу таасирин азайтуу максатында мыйзам долбоорлору иштелип чыккан.

Мыйзам долбооруна ылайык, желим баштыктардын ордуна биологиялык жактан ажыроочу таңгактарды колдонуу сунушталууда. Ошол эле учурда полимер материалдардан жасалган бир жолу колдонулуучу желим баштыктарды алып келүүгө, өндүрүүгө жана сатууга тыюу салуу каралууда.

Эл өкүлдөрү бул мыйзам долбоорун колдоп, полимердик материалдардын адамдын ден соолугуна тийгизген зыянын азайтуу керектигин белгилешти.