Парламент төрагасы казак кесиптештерине токой өрттөрүнөн курман болгондорго байланыштуу көңүл айтты

Жогорку Кеңештин төрагасы Нурланбек Шакиев Казакстан парламентинин Сенатынын төрагасы Маулен Ашимбаев менен Мажилисинин төрагасы Ерлан Кошановго адамдардын өлүмүнө алып келген өрт кырсыгына байланыштуу көңүл айтуу телеграммасын жөнөттү. Бул тууралуу парламенттин маалымат кызматы билдирет.

“Казакстандын чыгышында катталган өрттүн кесепетинен токой чарбасынын бир топ кызматкерлеринин каза болгондугу тууралуу кабарды терең кайгыруу менен кабыл алдык. Кыргыз Республикасынын Жогорку Кеңешинин жана жеке ѳзүмдүн атымдан маркумдардын жакындарына көңүл айтуу менен бирге жабыркагандардын тез арада сакайып кетишин каалайм.

Сиздердин ушул күндөрдөгү кайгыңыздарды тең бөлүшөбүз жана бир тууган казак элине сабырдуулук тилейбиз”, - деп айтылат төраганын телеграммасында.

Белгилей кетсек, Казакстандын чыгышындагы токойлордон өрт чыгып, анын кесепетинен 14 адам каза болгон.

Казакстандын президенти Касым-Жомарт Токаев 12-июнду өлкөнүн чыгышындагы ири өрт кырсыгында каза болгондор үчүн улуттук аза күтүү күнү деп жарыялады.