Өлкөдө адам жүзүн тааныган видеокамералар аркылуу издөөдө жүргөн 57 адам кармалды 

Өлкөдө 2-июндан бери адамдардын жүзүн таануучу сырткы видеокамералар аркылуу эл аралык издөөдө жүргөн 57 адам кармалды. Бул тууралуу Ички иштер министрлигинен билдиришти.

Маалым болгондой, кармалган жарандар маалымат базалар аркылуу текшерилип, каттоого алынган.

Алардын арасында КМШ өлкөлөрүндө ар кандай кылмыштарды жасаган, анын ичинде уурулук, алдамчылык, документтерди жасалмалоо, тоноо, опузалоо, адам уурдоо, адам өлүмү менен коштолгон жол кырсыгы, денеге атайылап оор залал келтирүү фактылары боюнча айыпталып, мамлекеттер аралык издөөгө алынганы бар. Айрымдары мындан 8-9 жыл мурда издөөгө алынганы да маалым болгон.

Учурда Ички иштер министрлигинин борбордук аппаратынын Маалыматтык технологиялар башкы башкармалыгы, Коомдук коопсуздук кызматынын ыкчам башкаруу борбору, Кылмыш иликтөө башкы башкармалыгы, ошондой эле башка кызматтары жана бөлүмдөрү биргелешип иш алып барууда.