Казакстандык спортчулардан массалык түрдө допинг аныкталууда

Коңшу Казакстандын алты оор атлетчиси допинг-тесттен кийин мелдештерден четтетилди. Бул тууралуу Казакстандын оор атлетика федерациясы кабарлады.

Буга чейин жаштар арасында дүйнө чемпиону Артем Антропов жазаланганы белгилүү болгон. Казакстандын улуттук допингге каршы борбору башка мыйзам бузууларды дагы аныктады.

"Төмөнкү спортчулардан оң жыйынтык табылды: Арли Чонтей, Екатерина Алякина, Денис Полубоаринов, Алина Колиушко, Алексей Чуркин жана Нургиса Адилетулы", - деп айтылат Казакстандын оор атлетика федерациясынын билдирүүсүндө.

Спортчулар допингге каршы эреженин бузулушу тууралуу билдирүүлөрдү алышкан. Алардын ар бири боюнча акыркы чечим толук иликтөөнүн жыйынтыгында чыгарылат. Жогорудагы спортчулардын баары спорттук иш-чараларга жана машыгуу сборуна катышуудан убактылуу четтетилди.

Белгилей кетсек, 31 жаштагы Арли Чонтей 2021-жылкы Дүйнө чемпиону, ал эми тизмедеги дагы эки адам быйыл Түштүк Кореяда өткөн Азия чемпиондугунда байгелүү орундарды алышкан.