Маданият министрлиги Моргенштерндин Бишкектеги концертин жокко чыгарышы мүмкүн

Орусиялык репэр Алишер Моргенштерндин Бишкекте пландаган концерти жокко чыгышы мүмкүн.

Бүгүн, 16-июнда “Ата-Журт Кыргызстан” парламенттик фракциясынын жыйынында депутат Алишер Козуев орусиялык рэпердин Бишкекте пландаган концерти жаштарга терс таасирин берерин айтты.

"Сиздерге сырттан келеби же ичтенби, иш-чара өткөрөрдө сиздер менен макулдашылабы? Жакынкы күндөрү биздин жаштарыбызга терс таасирин тийгизе турган чет элдик Моргенштерн деген киши концерт койгону жатат. Ошого чара крбөйсүздөрбү", - деди Козуев.

Өз кезегинде Маданият министри Алтынбек Максутов бул боюнча министрлик иш алып барып жатканын айтты.

"Бул боюнча иш алып барып жатабыз. Биз кечээ күнү дагы тапшырма берип, ошол имараттын жетекчиси менен дагы сүйлөшүп, иштерди алып барып жатабыз. Бул боюнча биздин дагы сиз менен пикирибиз бир. Анткени Орусияда дагы бул кишиге кылмыш иши козголгон. Концертти токтотуу үчүн иштерди алып барып жатабыз", - деди Максутов.

Моргенштерндин Бишкектеги концерти 23-июнга пландалган.