"Байыганымды факты менен айтыңыз". Алтынбек Максутов менен Жеңишбек Токторбаев кайым айтышты (видео)

Маданият министри Алтынбек Максутов депутат Жеңишбек Токторбаевдин сөзүн сынга алды.

Бүгүн, 16-июндагы “Ата-Журт Кыргызстан” парламенттик фракциясынын жыйынында депутат Жеңишбек Токторбаев коомдо "Алтынбек Максутов кызматка келгенден кийин абдан толуп, анан бир аз байыды" деген сөз болуп жатканын айтты.

Өз кезегинде Максутов депутаттын бул сөзүнө кошулбай турганын айтып, аны факты менен сүйлөөгө чакырды.

"Менин толуп кеткеним боюнча жооп берейинчи, эми ар кимдин организми ар кандай экен, чай ичеби, ичпейби. Анан сиз мени "Байып кетти" деп каралап жатасыз. Эгерде сиздин менин эмне болуп байып кеткендигим тууралуу фактыңыз болсо бериңиз. Анан жөн эле кооздоп сүйлөй берген деле болбойт", - деди Максутов.

"Фактыны столдун үстүнө таштап койдум", - деп жооп берди Токторбаев.

Өз кезегинде фракциянын төрагасы Бакытбек Сыдыков Алтынбек Максутовду кайым айтышпоого чакырды.