Депутаттар Эдил Байсаловду кызматтан кетирүү маселесин кароо керектигин айтышты

Депутат Шайлообек Атазов министрлер кабинетинин төрагасынын орун басары Эдил Байсалов чакырылганына карабай “Ата-Журт Кыргызстан” парламенттик фракциясынын жыйынына келбегени үчүн кызмат ордун кароо керектигин айтты.

"Бүгүнкү жыйынга Акылбек Үсөнбекович же Эдил Байсалов деген мырза келсе жакшы болор эле", - деди Атазов.

Өз кезегинде Бакытбек Сыдыков Эдил Байсалов менен финансы министри Алмаз Бакетаев бүгүнкү жыйынга келем деп келбей коюшканын айтты.

"Шайлообек Карыбекович, Бакетаев жана Байсалов боюнча бүт баары сүйлөшүлүп, келебиз дешкен. Мына телефонограммасы жок, эч нерсеси жок келбей коюшту. Биз бул боюнча чара көрөбүз", - деди Сыдыков.

Шайлообек Атазов дагы Эдил Байсаловдун кызмат ордун караш керектигин айтты.

"Эдил Байсалов мырза келбегендиги үчүн анын иш ордун караш керек. Өткөндө дагы биз башка тема боюнча президентке сунуш бергенбиз", - деди Атазов.