"Келишимге кол коюлду". Кыргызстандык студенттер окуусун Кореяда уланта алат

Кыргызстандык студенттердин Корея Республикасында окуусун улантууга мүмкүнчүлүк берген келишимге кол коюлду. Бул тууралуу парламенттин басма сөз кызматы билдирди.

Маалым болгондой, Кыргызстандагы университеттердин ректорлору жана депутат Аида Исабек кызы Түштүк Кореянын Гуми шаарындагы Кюнгвон университетинде өтүп жаткан келечектеги билим берүү маселелерине арналган «ASEAN-KOREA Experts» форумуна катышууда.

Форумга Азия өлкөлөрүнөн билим берүү тармактарынын өкүлдөрү, саясатчылар, эксперттер катышууда. Иш-чаранын алкагында панелдик дискуссиялар өтүп, келечектеги билим берүү саясаты, Азия өлкөлөрүндө окутуучулардын квалификациясын жогорулатуу, 2030-жылга чейин глобалдык тилектештик жана регионалдык кызматташуу механизми, жогорку окуу жайлардын мүмкүнчүлүктөрүн кеңейтүү, глобалдык жана футуристтик билим берүүгө өтүү маселелери талкууланды.

Андан соң кыргызстандык студенттерге окуунун биринчи жылын аяктагандан кийин Корея Республикасында окуусун улантууга мүмкүндүк берүүчү алкактык келишимге кол коюлду.

Белгилей кетсек, студенттер Кореяда окуусун аяктагандан кийин аталган өлкөдө ишке орношуу укугуна ээ болушат.