"Алтын сертификаттын" ээси Муратбек: "Түштүк Кореядагы Кванджу илим жана технология институтуна тапшырдым"

Быйыл өлкөдө ЖРТнын упайы боюнча "Алтын сертификат" алуу укугуна 54 мектеп бүтүрүүчүсү ээ болду. Мындай ийгиликке жетишкен окуучулардын катарын Муратбек Ажымаметов дагы толуктайт. Ал жалпы республикалык тестирлөөдөн 225 упай алды.

Ошондой эле каарманыбыз Ош шаары боюнча артыкчылык аттестаты менен аяктап жаткан сегиз окуучунун бири. Ийгиликтүү окуучулардын катарын толуктаган Муратбек менен маектешип, өзү жөнүндө, алдыдагы пландары тууралуу маек курдук.

- Саламатсызбы, Муратбек? "Алтын сертификат" алуу укугуна ээ болгонуңуз менен куттуктайбыз. Толкунданып жатсаңыз керек...

- Саламатсызбы, ооба. Алгач мен мындай жаңылыкты ата-энемден уктум. Сертификатка ээ болгонума аябай сүйүндүм. Көптөгөн аракеттердин пайдасы тийип жатканына кубандым.

- Алгач өзүңүз жөнүндө айтып берсеңиз? Каяктан болосуз, кайсы мектепти бүтүрүп жатасыз?

- Мен Ош облусуна караштуу Кара-Кулжа районунун Алайкуу айыл аймагынан болом. Үй-бүлөдө 7 бир туугандын бешинчисимин. Ата-энем экөө тең мугалимдик кесипти аркалашат. Мен алгач Бишкек шаарындагы №62 гимназияда окугам. Андан кийин Ош шаарындагы Нариманов атындагы №7 мектебинде билим алдым. Учурда Ош шаарындагы “Сема Кембридж” лицейин бүтүрүп жатам.

- Жалпы республикалык тестирлөөдөн "Алтын сертификат" алам деп ойлодуңуз беле?

- Жалпы республикалык тестирлөөгө акыркы бир жыл ичинде даярдандым. Негизи тестирлөөдөн чыккандан кийин эле ичимден "Алтын сертификатка" ээ болорумду сезгем. Бирок дайыма ички сезимдерге ишене бербеш керек деген ойдомун.

- Быйыл мектепти кандай бүтүрүп жатасыз?

- Коомдук иштерге катышканым боюнча айтсам, 10-класста лицейдин парламентинде иш алып бардым. Быйыл физика сабагынан олимпиадага катышкам, бирок жакшы даярданбагандыктан олимпиаданын 4-баскычына өтпөй калдым. Ошондой эле 11-классты артыкчылык аттестаты менен аяктап жатам.

- Физика сабагынан олимпиадага баргам деп калдыңыз, физикага кызыгат окшойсуз. Учурда тандап жаткан кесибиңиз да физика багытындабы?

- Ооба, физика тармагына кызыгам. Өзгөчө математиканы жакшы көрөм. Келечекте инженер болгум келет. Бул тармакка кичинемден бери эле кызыкчумун. Азыр болсо Түштүк Кореядагы Кванджу илим жана технология институтуна (Gwangju Institute of Science and Technoloji) тапшырдым. Негизи механикалык инженерия багытын окугум келип турат, бирок инженериянын башка багыттарына да кызыгып жатам.

- Кайсы чыгармаларды сүйүп окуйсуз? Бош убактыңызда эмне менен алектенсиз?

- Мен көп деле китеп окуган эмесмин, бирок Чыңгыз Айтматовдун чыгармаларын жактырам. Бош убактымда ата-энеме жардам бергенге аракет кылам. Тамак жасаганды жакшы көрөм, тамактардын түрлөрүнө кызыгам. Кээде досторум менен футбол ойнойм, өзүм дагы үйдөн спорт менен машыгам.

- Маегиңиз үчүн ыраазычылык билдиребиз. Ийгилик каалайбыз!