Ысык суу эмнеге берилбей жатат? “Бишкек жылуулук тармактар” ишканасы себебин түшүндүрдү

Бишкектеги абоненттерге суу берүү түйшүктүү иш болгондуктан убакытты талап кылат. Учурда суу берүүнү жөнгө салуу иштери жүрүп жатат. Бул тууралуу “Бишкек жылуулук тармактар” ишканасынан билдиришти.

Эскерте кетсек, Бишкекте ысык суу 22-майдан 22-июнга чейин өчүрүлгөн. Мындай өчүрүүлөр профилактикалык иштерди жүргүзүп, жылытуу мезгилине даярдык көрүү максатында жыл сайын болуп келет.

Бирок күн мурун, 22-июнда (суунун бериле турган күнү) жана бүгүн, 23-июнда борбор калаанын көптөгөн жашоочулары социалдык тармактарда суу берилбей жаткандыгына нааразычылыктарын билдиришкен.

“Жакынкы эки күндүн ичинде бардык абоненттерге ысык суу берилет. Шаардыктардан келтирилген ыңгайсыздык үчүн кечирим сурайбыз жана түшүнүү менен мамиле кылуусун суранабыз”, - деп айтылат маалыматта.