Президент Садыр Жапаров: "Каныш-Кыядагы аэропорт кандай берилсе толук ошондой кайтарып алгыла" (видео)

Президент Садыр Жапаров Чаткалдагы Каныш-Кыя аэропортунун курулуш иштерин баштай тургандыгын айтты. Бул тууралуу ал "Ысык-Көл" аэропортунун аэробекетинин курулушуна капсула салган иш-чарада айтканын маалымат кызматы кабарлады.

Маалыматка ылайык, өлкө башчысы Садыр Жапаров Чаткалдагы аэропортунун курулуш иштерин 2024-жылы жаз айында баштап, жыл аягына чейин ишке берерин айтты.

"Кудайым буйруса, Чаткалдагы аэропорттун курулуш иштерин эмдиги жылы жаз айында баштап, жылдын аягына чейин ал аэропортту дагы кайрадан жандандырып, ишке беребиз. Урматтуу аэропорттун жетекчиси, Каныш-Кыя айылындагы аэропорт 2000-жылдары эле облустук администрациянын балансына мыйзамсыз өтүп кеткен экен. Аны тез арада эртеңден баштап "Манас" аба майданынын карамагына өткөрүп алыңыз. Анткени жергиликтүү бийликтин рейс учурганга самолету жок. 2000-жылы кандай берилген болсо, толук ошол бойдон аласыз. Эгер кокус эле менчикке бир нерселер салып алган болсо сүрдүрүп саласыз", - деди өлкө башчы.