Элчи Улукбек Марипов Мекке шаарындагы кыргызстандыктар менен жолукту (фото)

Кыргыз өлкөсүнүн Сауд Арабиядагы элчиси Улукбек Марипов Мекке шаарында Сауд Арабия падышасынын атынан уюштурулган расмий кабыл алууга катышты. Бул тууралуу бүгүн, 3-июлда Тышкы иштер министрлигинен билдиришти.

Маалыматка ылайык, кабыл алуунун жүрүшүндө элчи Улукбек Марипов Сауд Арабиянын мураскер ханзаадасы жана премьер-министри Мухаммад бин Салман Аль Сауд менен жолугуп, Сауд Арабиянын жетекчилигин жана элин президент Садыр Жапаровдун атынан Курман айт майрамы менен куттуктаган. Ошондой эле республиканын жетекчилигинин атынан ажылыктын жогорку деңгээлде уюштурулгандыгы үчүн ыраазычылык билдирген.

"Мындан сырткары Улукбек Марипов Меккеге болгон иш сапарынын алкагында кыргызстандык зыяратчылар жана ажылык сапарын уюштуруу боюнча республикалык штабдын мүчөлөрү менен жолугушууларды өткөрүп, аларга түзүлгөн шарттар менен таанышты", - деп жазылат маалыматта.