Алты айда Жогорку Кеңешти каржылоого бюджеттен жарым миллиард сомдон ашык каражат сарпталды

Быйыл алты айда Жогорку Кеңештин чыгымдарын каржылоого бюджеттен 571 миллион 752,1 миң сом бөлүнгөн. Бул тууралуу Финансы министрлиги билдирет.

Маалыматка караганда, каражаттын негизги бөлүгүн Жогорку Кеңештин депутаттарынын, алардын жардамчыларынын жана башка адистердин эмгек акысы болуп эсептелет. Бул сумма 398 миллион 526,1 миң сомду же бөлүнгөн акчанын 69,7 пайызын түзөт.

Мындан тышкары, дагы 57,2 миллиону башка товарларды жана кызматтарды сатып алууга жана 53,9 миллиону Социалдык фондго чегерүүлөргө жумшалган.

Унаа жана жабдуулар үчүн 21 миллион 339 миң сомдон ашуун, ошондой эле кызматтык сапарлар үчүн 15 миллион 540 миң сом каралган. Ал эми байланыш үчүн 2,3 миллион сом жумшалган.

Кошумчалай кетсек, 12,6 миллион сом Жогорку Кеңештин төрагасынын резервдик фонду болгон.