Кыргыз жарандарынын Түркияда визасыз режимдин мөөнөтүн кеңейтүү талкууланды 

Кыргызстандын Түркиядагы элчиси Руслан Казакбаев Түркиянын ички иштер министринин орун басары Мехмет Акташ менен жолугушту. Бул тууралуу бүгүн, 5-июлда Тышкы иштер министрлигинен билдиришти.

Маалымдалгандай, жолугушуунун жүрүшүндө Кыргыз жарандарынын Түркия аймагында жүрүүсүнө байланыштуу актуалдуу маселелер талкууланды.

Элчи Кыргызстан жана Түркия жарандарынын өз ара сапарлары, анын ичинде ички паспорттор боюнча жана Кыргыз жарандары үчүн Түркиядагы визасыз режимдин мөөнөтүн 90 күндөн 180 күнгө чейин кеңейтүү маселелеринин маанилүүлүгүн билдирди.

Мындан тышкары, Кыргыз жарандарынын Түркияда жашоого уруксат алуу шарттарын жеңилдетүү жана алардын мыйзамдуу жүрүү мөөнөтүн узартуудан баш тартуулардын санын азайтуу өтүнүчү айтылды.

Ошондой эле элчи Казакбаев түрк кесиптештерине мыйзамсыз жүргөн Кыргыз жарандарына айыпсыз жана тыюу салуусуз чыгып кетүү жана андан ары мыйзамдаштыруу максатында миграциялык мунапыс берүү мүмкүнчүлүгүн карап чыгууну сунуштады.

Министрдин орун басары Мехмет Акташ кыргыз тараптын сунуштарын изилдеп жана Түркиянын кызыкдар органдары менен биргеликте тиешелүү иштерди жүргүзүүгө даяр экендигин билдирди.

Жолугушуунун жыйынтыгында тараптар жакынкы аралыкта эки мамлекеттин ички иштер министрлеринин өз ара сапарларын уюштуруу, ошондой эле биргелешкен иштерди улантуу боюнча макулдашууга жетишти.