Кыргызстандын коргоо министри Азербайжанга расмий иш сапары менен барды (фото)

Кечээ, 6-июлда Кыргызстандын коргоо министри Бактыбек Бекболотов Азербайжанга расмий иш сапары менен барды. Бул тууралуу аталган министрликтин маалымат кызматынан билдиришти.

Маалымдалгандай, иш сапардын алкагында министр "Шэхид Аллеясында" гүлчамбар койду. Андан соң эки өлкөнүн коргоо ведомстволорунун башчыларынын расмий жолугушуусу болуп өттү.

"Жолугушуунун жүрүшүндө Азербайжандын коргоо министри Закир Гасанов менен бетме-бет сүйлөшүү, ошондой эле делегациялардын кең форматта жолугушуусу болуп, келечектеги аскердик жана аскердик-техникалык кызматташуунун өнүгүүсүнүн актуалдуу маселелери талкууланды", - деп айтылат билдирүүдө.

Мындан тышкары, иш сапардын алкагында Азербайжандын премьер-министринин биринчи орун басары Ягуб Эюбов жана коргоо өндүрүшүнүн министри Мадат Гулиев менен жолугушуу пландаштырылган.