Арзыбек Кожошев "Натыйжалуу логистика жана үзгүлтүксүз технологиялар" эл аралык бизнес форумуна катышты

Кечээ, 7-июлда Евразия экономикалык комиссиясынын энергетика жана инфраструктура министри Арзыбек Кожошев Кытайдын Ченду шаарында өткөн "Натыйжалуу логистика жана үзгүлтүксүз технологиялар" эл аралык бизнес форумуна катышты.

Маалыматка ылайык, иш-чарага ЕАЭБ өлкөлөрүнөн, Кытайдан жана башка мамлекеттерден 50дөн ашык транспорттук-логистикалык компаниялардын, ассоциациялардын эксперттери жана жетекчилери катышты.

"Арзыбек Кожошев ЕАЭБде Чыгыш-Батыш жана Түндүк-Түштүк багыттарында транспорттук жана жумшак инфраструктураны түзүү жана өнүктүрүү боюнча Комиссия тарабынан жүргүзүлүп жаткан транспорт жана логистика тармагындагы иштер тууралуу маалымат берди. Анын ичинде 2024-2026-жылдарга макулдашылган транспорт саясатынын негизги багыттарын ишке ашыруу боюнча жол картасын камтыган кытайлык "Бир алкак, бир жол" демилгеси менен интерфейстин алкагында, ЕАЭБ менен КЭР ортосундагы соода-экономикалык кызматташтыкты өнүктүрүү кызыкчылыгында темир жол жүк ташууларын санариптештирүү, деңиз транспортунда электрондук документ жүгүртүүгө өтүү өңдүү эң маанилүү долбоорлор туурасында", - деп айтылат билдирүүдө.

Кожошев белгилегендей, темир жол транспорту өнүккөн заманбап инфраструктурага ээ болуу менен туруктуулукту жана жүк ташуунун прогрессивдүү өсүшүн ишенимдүү көрсөтүп турат. 2015-жылга салыштырмалуу ЕАЭБде транзиттик жүк ташуу беш эседен ашык өстү. Өткөн жылы трафиктин көлөмү 1 миллион контейнерден ашты, бул ЕАЭБдин Европа менен Азия-Тынч океан чөлкөмүнүн өлкөлөрүнүн ортосундагы натыйжалуу байланыштыруучу ролун ачык айгинелеп турат.

"Аймактык темир жол транзитин өнүктүрүү контекстинде министр Рашт-Астара темир жол участогун куруу долбоорун белгиледи, ага ылайык ушул жылдын май айында. Орусия менен Ирандын ортосунда өкмөттөр аралык келишимге кол коюлду, ошондой эле Кытай-Кыргызстан-Өзбекстан темир жол курулушу долбоору белгиленди, ага ылайык үстүбүздөгү жылдын май айында Сиань шаарында өткөн Кытай-Борбор Азия саммитинде бул долбоорду ишке ашырууну баштаган Меморандумга кол коюлду", - деп айтылат маалыматта.

Жакынкы арада Орусия тарап Азербайжан менен Ирандын катышуусунда үч тараптуу форматта Түндүк-Түштүк багыты боюнча темир жол инфраструктурасын жана жүк ташууларын өнүктүрүү боюнча кызматташуу боюнча макулдашууну даярдоону жана кол коюуну аяктоону пландаштырууда.

"Бул коридордун өнүгүшү Казакстандын Каспийдеги порт терминалдарынын кубаттуулуктарын куруу жана көбөйтүү боюнча аракеттери менен колдоого алынат. ТМТР аркылуу жүк ташууларды өнүктүрүү максатында "Актау деңиз порту" эркин экономикалык аймагынын базасында контейнердик хаб түзүү пландаштырылууда. Бул иш-чаралар учурдагы каттамдарды трансформациялоо доорунда жана эл аралык каттамдарды куруунун жана өнүктүрүүнүн актуалдуулугун жогорулатуунун доорунда кошумча коммуникацияларды жана жаңы туруктуу жеткирүү чынжырларын курууга мүмкүндүк берет".

Өз сөзүндө Арзыбек Кожошев форум логистика жана транзит чөйрөсүндө жаңы идеяларды жана чечимдерди иштеп чыгуу үчүн жаңы өнөктөштүктү түзүүгө жана учурдагыларын бекемдөөгө мүмкүндүк берет деген ишенимин билдирди. Ошондой эле мультимодалдык ташууларды өнүктүрүү, ташуу процессин уюштуруу үчүн алдыңкы санариптик технологияларды киргизүү, транспорт сегментинин коопсуздугун жана экологиялык тазалыгын жогорулатууга шарт түзүүгө өзгөчө көңүл буруу менен биргелешкен кызматташууга чакырды.