Ысык-Көлдө жол коопсуздугунун кызматкерлери жүргүнчүлөрдү ташыган унааларды текшерди

Ысык-Көлдө жол коопсуздугунун кызматкерлери жүргүнчүлөрдү ташыган унааларды текшерди. Бул тууралуу бүгүн, 8-июлда облустук милициядан билдирди.

Маалыматка ылайык, саамалык жайкы туристтик мезгил учурунда жүргүнчүлөрдү ташуу чөйрөсүндө коопсуздукту камсыз кылуу жана жол кырсыктарын алдын алуу максатында өткөрүлгөн.

"Жүргүнчү ташуучу унаалардын катышуусу менен болгон жол кырсыктарынын негизги себептери болуп, айдоочулардын жол кыймылынын эрежелеринин талаптарын аткарбаганды, атап айтканда, ылдамдыктын эрежелеринин сакталбагандыгы, жөө жүргүнчүлөр өтүүчү өтмөктөрдө жол эрежелерин бузуусу, аралыкты туура эмес тандап алуусу болуп саналат. Ушундан улам жакында Ысык-Көл районунун аймагында жүргүнчүлөрдү ташуу менен алектенген айдоочулар арасында профилактикалык иш-чара болуп өттү. Рейд учурунда жүргүнчүлөрдү ташыган автотранспорттун техникалык абалына, жүргүнчүлөрдү ташуу саны менен айдоочулар тарабынан талаптардын сакталышына өзгөчө көңүл бурулду", - деп айтылат билдирүүдө.

Ошондой эле жүргүнчүлөрдү ташуу менен алектенген ишканалар да текшерилди.

"Айдоочуларды рейс алдында медициналык кароодон өткөрүүнү жана унаалардын техникалык абалын текшерүүнү кандай уюштуруп жаткандыгы текшерилди. Айдоочулардын эмгек жана эс алуу режиминин сакталышы, техникалык кароодон өтүшү, ошондой эле өзгөчө көзөмөлдүн алдында балдардын топторун ташууну ишке ашырган автобустар да текшерилип чыкты. Мындан тышкары, Чолпон-Ата шаарынын автобекетинде станциялык курулманын жанаша аймагынан уруксатсыз жеңил унаа таксилерди жана автобустарды жөнөтүү, ошондой эле башаламан токтотмолорду жана унаа токтотуучу жайлары да текшерилди", - деп айтылат маалыматта.