Эл артисти Реджабай Таджибаев дүйнөдөн кайтты

Кыргыз Республикасынын эл артисти, Бабур атындагы Ош мамлекеттик академиялык өзбек музыкалык драма театрынын чыгаан актёру Реджабай Таджибаев бүгүн, 9-июлда 73 жаш курагында мезгилсиз дүйнөдөн кайтты. Бул тууралуу Маданият, маалымат, спорт жана жаштар саясаты министрлигинен кабарлады.

Реджабай Таджибаев 1950-жылы Ош шаарында туулган.

Ал эмгек жолун 1972-жылдан тарта Бабур атындагы Ош мамлекеттик академиялык өзбек музыкалык драма театрында драма артисти катары баштап, өмүрүнүн аягына чейин аталган театрда эмгектенди.

Өз мезгилинде таланттуу актёр катары бир топ мыкты ролдорду жаратып, табият берген таланты менен кыргыз театр искусствосуна зор салым кошту.

Реджабай Таджибаевдин кыргыз театр искусствосу үчүн кылган эмгеги бааланып, 1990-жылы ага “Кыргыз Республикасынын эмгек сиңирген артисти” наамы, 2022-жылы “Кыргыз Республикасынын Эл артисти” жогорку наамы ыйгарылган.

SUPER.KG порталынын эмгек жамааты анын жакындарына терең кайгыруу менен көңүл айтып, аза кайгысын тең бөлүшөт.