Жаныш Рустенбековдун сөөгү "Ала-Арча" көрүстөнүнө коюлду

Көрүнүктүү мамлекеттик ишмер, саясатчы, дипломат Жаныш Рустенбековдун сөөгү Бишкек шаарындагы "Ала-Арча" көрүстөнүнө коюлду.

Маркумду акыркы сапарга узатуу зыйнатына министрлер кабинетинин төрагасы Акылбек Жапаров баштаган өкмөт мүчөлөрү жана Жогорку Кеңештин депутаттары катышты.

Өкмөт башчы президенттин, жалпы Министрлер кабинетинин жана жеке өзүнүн атынан Жаныш Рустенбековдун үй-бүлөсүнүн, жакын туугандарынын аза кайгысын тең бөлүшүп, терең кайгыруу менен көңүл айтты. Акылбек Жапаров маркумдун басып өткөн өмүр таржымалына токтолуп, анын уюштуруучулук жөндөмү күчтүү, саясий көз караштары бекем сапаттарын белгиледи.

Белгилей кетсек, Жаныш Рустенбеков 74 жаш курагында каза болду. Ал Легендарлуу парламенттин депутаты, Кыргыз Республикасынын мамлекеттик катчысы, президенттин администрация жетекчиси, Жогорку Кеңештин депутаты, Өзгөчө кырдаалдар министри, Кыргызстандын Казакстандагы, Түркмөнстандагы жана Тажикстандагы элчиси болуп бир катар кызматтарда иштеген.