Бишкекте бир канча жолдор оңдолууда

Бишкекте жолдорду жана тротуарларды оңдоо иштери уланууда. Бул тууралуу бүгүн, 13-июлда Бишкек мэриясынан билдиришти.

Маалым болгондой, учурда Менделеев көчөсүн, Кажысай жана Енисей тар көчөлөрүнүн жолдорун капиталдык оңдоп-түздөө иштери аяктады.

Ал эми Алай жана Балыкчы тар көчөлөрүндө жолду асфальттоо иштери кызуу жүрүүдө. Учурда жол асфальт-бетон төшөө үчүн даярдалып жатат. Ошондой эле Керчинский тилкесинде курулуш иштери башталды.

Мындан тышкары, Чүй проспектисин бойлой Осмонкул көчөсүнөн Гоголь көчөсүнө чейин (түштүк тарабы) тротуарды куруу иштери уланууда. Бордюрлар, сугат лотоктору орнотулуп бүттү.

Чүй проспектисинин Курманжан Датка көчөсүнөн Т.Айтматов көчөсүнө чейин (түндүк тарабы) жана Абдрахманов көчөсүндө Жумабек көчөсүнөн Түгөлбай-Ата көчөсүнө чейин (чыгыш тарабы) тротуарды капиталдык оңдоо иштери жүрүүдө.