Кыргызстандан көмүрдү экспорттоого убактылуу тыюу салуу сунушталды

Кыргызстандан көмүрдү экспорттоого 8 айлык мөөнөткө убактылуу тыюу салуу сунушталды. Бул тууралуу Министрлер кабинетинин токтом долбоору коомдук талкууга коюлду.

Ага ылайык, көмүрдү кыргыз-кытай мамлекеттик чек арасындагы "Эркеч-Там" жана "Торугарт" өткөрүү пункттары аркылуу гана өткөрүүгө уруксат берүү сунушталууда.

"2023-2024-жылдардын күз-кыш мезгилинен өтүү мезгилинде калкка жана бюджеттик мекемелерге көмүр жетишсиз болгондо жана баасы жогорулаган учурда президенттин облустардагы ыйгарым укуктуу өкүлдөрүнө, жергиликтүү мамлекеттик администрациялардын башчыларына, айыл өкмөт башчыларына жеке жоопкерчилик жүктөлсүн.

Бул токтом расмий жарыялангандан соң үч күн өткөндөн кийин күчүнө кирет", - деп жазылат маалыматта.

Буга чейин күз-кыш мезгилине Бишкек ЖЭБине 1,2 миллион тонна көмүр керектелип, анын 550 миң тоннасы импорттолору, ал эми калк үчүн 1,3 миллион тонна көмүр камдалышы керек экендиги маалымдалган.