Нарында эс алуу аянтчага чек арада курман болгон жоокердин ысымы ыйгарылды

Нарын шаарындагы эс алуучу аянтчага 2022-жылдын сентябрында Баткенде кыргыз-тажик чек арасындагы куралдуу жаңжалда курман болгон "Бөрү" атайын чек ара кызматынын кызматкери Нурсултан Жаныбековдун ысымы ыйгарылды. Бул тууралуу Нарын шаардык мэриясынан билдиришти.

Маалыматка ылайык, жоокердин ысымы коюлган Мазар булак аймагындагы сквердин айланасын туугандары жарыктандырып берет.

Мындан тышкары Нурсултан Жаныбековдун атасы Таалайбек Осонов Нарын шаарынын мэри Канболот Тутуев менен жолугушуп, 50 миң сом тапшырган.

Учурда аталган сквер республикалык түрткү берүүчү гранттык каражаттын эсебинен реконструкцияланууда.

"Демөөрчү Таалайбек Осонов менен жолугушкан калаа башчысы ыраазычылыгын билдирип, мекен чегинде татыктуу кызматын өтөгөн Нурсултандай уулду тарбиялаганын белгилеп, ысымын түбөлүккө калтыруу менен аты коюлган паркты жергиликтүү тургундар үчүн ыңгайлуу шарттары менен пайдаланууга берип, өнүктүрүүнү сүйлөшүштү", - деп айтылат маалыматта.