Ошто "казинодо он миң долларын уттуруп жиберди" делген окуя: Аталган жай жабылды

Ошто кыргыз жараны 10 миң доллар өлчөмүндөгү акчасын уттуруп жиберди делген бинардык опцион жабылды. Бул тууралуу президенттин басма сөз кызматынын жетекчиси Дайырбек Орунбеков социалдык тармактагы баракчасында билдирди.

Маалыматка караганда, аталган жай казино эмес, букмекер (компьютердеги автоматтык оюн) экени аныкталган. ИИМдин иликтөөсүнүн натыйжасында 40тан ашык бинардык опциондор жабылып, кылмыш иши козголгон.

"ИИМдин Кылмыш иликтөө башкы башкармалыгынын маалыматы боюнча, республиканын аймагында бинардык опциондорго жамынган 30дан ашык оюн-зоок жайлары иштеп, аларда интернет аркылуу виртуалдык каржылык оюндар жана башка ар кандай кумар оюндары уюштурулган. Бинардык опцияларды соодалоого жамынып, узак убакыт бою мыйзамсыз иш-аракеттер жүргүзүлүп келген" - деп айтылат маалыматта.

Ошондой эле тергөөнүн жүрүшүндө тинтүү иштери жүргүзүлүп, аталган мекемелердин кызматкерлери жана ойногондор сурак берген жана компьютердик техникалары алынган. Ал эми Бишкек, Ош, Чүй, Ош жана Жалал-Абад облустарында жайгашкан 45тен ашык мекеме жабылып, учурда тиешелүү иш чаралар улантылып жатканы маалымдалды.

Эске салсак, буга чейин Ош шаарында бинардык опциондо кыргыз жаранынын 10 миң доллар өлчөмүндөгү акчасын уттуруп алганын айткан видео тараган. Көп өтпөй Ош ШИИБинен окуяга байланыштуу иликтөө башталганы кабарланган.