Ирандагы хиджаб чыры: Полиция көчөлөрдү жөө кыдыра баштады

Иранда коомдук жайларда хиджаб кийүү нормаларынын сакталышын көзөмөлдөө үчүн полиция кызматы унаа жана жөө патрулдарды ишке тартууда. Бул тууралуу Ирандын Tasnim агенттиги жазып чыкты.

Жергиликтүү укук коргоо органдарынын айтымында, мындай иш-чаралар "коомдук биримдикке жана коомчулуктун коопсуздугу үчүн" уюштурулуп жатат. Иранда мыйзам боюнча хиджаб кийүү милдеттүү болгондуктан, полиция кызматкерлери алгач жоолук салуудан баш тарткан аялдарга эскертүү берип, аларга хиджаб кийүүнү сунушташы керек. Эгер полицияга баш ийбегендер катталса, анда полиция кызматкери мыйзам бузгандарга карата "айрым мыйзамдуу чараларды" колдонуп, аларды жоопкерчиликке тарта алат.

Ирандын кылмыш кодексинде айтылгандай, хиджаб кийүүнүн нормаларын сактабагандарга айып пул санылат же 10 күндөн 2 айга чейин камалышы мүмкүн. Ошондой эле аларга административдик чара көрүлүп, мамлекеттик кызматтан кетүү, чет өлкөгө чыгуу жана мүлкүн конфискациялоо сыяктуу жазалар колдонулат. Мындан сырткары, хиджаб кийбөөгө үндөгөндөр бир жылдан он жылга чейин эркинен ажыратылат.

Эске салсак, былтыр сентябрда "туура эмес" хиджаб кийгени үчүн 22 жаштагы Махса Амини кармалып, полиция бөлүмүндө өлтүрүлгөн. Амининин өлүмүнөн кийин Иранда массалык нааразылык акциялары башталып, бир нече жаран эркинен ажыратылган, айрымдары дарга асылган. Нааразычылыктан кийин иран айымдары хиждабсыз жүрө башташкан.