Баткенде алты ай ичинде 600дөн ашык ишкер жеңилдетилген насыя алышты

Баткенде ушул жылдын 6 ай аралыгында «РСК Банк» жана «Айыл Банк» тарабынан 6 пайыздык насыялар жалпы 508 ишкерге берилди. Бул тууралуу бүгүн, 21-июлда президенттин Баткен облусундагы өкүлчүлүгүнөн билдиришти.

Маалыматка ылайык, 408 ишкер насыяны мал чарбачылыгы багытына алса, 100 ишкер дыйканчылык үчүн алды. Берилген насыялардын суммасы 232,1 миллион сомду түздү.

"Аны менен катар республикалык бюджеттен Финансы кредиттик фонду аркылуу чек арадагы акыркы окуяда жабыркаган ишкерлерди колдоо максатында, 107 ишкерге 1 пайыз менен жалпы 90,2 миллион сом насыя берилди. Жалпы 162 ишкер кайрылган, улам кредиттик келишимдер түзүлүп, насыясы которулууда", - деп айтылат маалыматта.

Мындан тышкары сүт секторунун өндүрүмдүүлүгүн жогорулатуу боюнча 5 фермер 2,5 миллион сом насыя алган.