Садыр Жапаров Сергей Лавровдун айткандарына жооп берди

Президент Садыр Жапаров "Кабар" маалымат агенттигине берген маегинде Орусиянын Тышкы иштер министри Сергей Лавровдун билдирүүсүнө комментарий берди.

19-июлда коммерциялык эмес уюмдардын өкүлдөрү менен жолугушуу учурунда Сергей Лавров Кыргызстанда мамлекеттик тил мыйзамынын кабыл алынышы боюнча пикирин билдирген. Анда ал Кыргызстандын Конституциясында орус тили улуттук баарлашуунун тили бойдон калганына карабастан, башка жакка бурулуп калганын билдирген.

Президент маегинде Сергей Лавровдун пикирине кошулбай турганын баса белгиледи.

"Сергей Лавров мыйзамды окубай туруп эле сүйлөп атса керек. Ал мыйзамда орус тили дискриминация болсун деген түшүнүк жок. Тескерисинче орус тили расмий тил катары колдонулат деп турат. Бул норма баш мыйзамда да бар. Бул нормалар кала берет. Мугалимдер менен врачтарга тиешеси жок. Элестетиңиз, мектепке орус улутундагы орус тил мугалимин алып атабыз дейли. Анан аны “сен кыргызча билбейт экенсиң” деп кызматка албай коёбузбу? Бизге кыргыз тили кандай керек болсо орус тили дагы ошондой керек. Анткени КМШ өлкөлөрү менен орус тилсиз иштей албайсың. Кытай, араб өлкөлөрүнө, ошол эле Европа өлкөлөрүнө барганда дагы орус тилинде сүйлөшүп атпайбызбы. Бул жерде биз өз тилибизди да толук өздөштүрөлү деп атабыз да. Мамлекеттик кызматкерлердин, депутаттардын сүйлөгөндөрүн байкасаңар. Жарымы орусча, жарымы кыргызча. Эч бирибиз же толук орусча сүйлөбөйбүз же толук кыргызча сүйлөбөйбүз. Аралаштырып урдуруп кете беребиз.

Ошондуктан эки тилди тең бирдей өздөштүрөлү. Керек болсо англис, француз, кытай тилин да үйрөнөлү. Канчалык көп тил билсен ошончолук өзүңө жакшы эмеспи", - деген Садыр Жапаров.