"Эми көк чымчык жок". Илон Маск Twitter'дин логотиби менен аталышын өзгөрттү

Twitter социалдык тармагынын ээси, америкалык миллиардер Илон Маск Twitter социалдык тармагынын атын жана логотибин өзгөрттү.

Көк чымчыктын ордуна Х тамгасы жазылып, Twitter'дин расмий баракчасынын аты менен сүрөтү дагы Х тамгасына өзгөртүлгөн.

Белгилей кетсек, кечээ, 23-июлда Илон Маск Twitter логотибин өзгөрткөнү жатканын социалдык тармактагы баракчасында жазган. Анда: "Жакында биз Twitter бренди жана акырындык менен бардык канаттуулар менен коштошобуз. Эгерде бүгүн кечинде жакшы X логотиби сунушталса, биз аны эртең бүткүл дүйнөгө жеткиликтүү кылабыз"-деп билдирүү калтырган.

Twitter буга чейин да логотибин өзгөрткөн учур катталган. 4-апрелде аталган социалдык тармактын логотиби Dogecoin криптовалютасындагы иттин сүрөтүнө өзгөргөн. Бирок 7-апрелде Twitter эски логотибин кайра калыбына келтирген болчу.

Эске салсак, Маск Twitter'ди 2022-жылдын октябрында 44 миллиард долларга сатып алган. Миллиардер компанияны сатып алгандан кийин дароо анын жетекчилигин толугу менен алмаштырып, кызматкерлердин дээрлик жарымын жумуштан бошоткон.