Равшан Жээнбековдун жубайынын камактагы мөөнөтү эки айга узартылды

Саясатчы Равшан Жээнбековдун жубайы Салкынай Алимбаеванын камактагы мөөнөтү дагы эки айга узартылды. Бул тууралуу Биринчи Май райондук сотунун басма сөз кызматы билдирди.

Маалым болгондой, мындай чечим 21-июлда кабыл алынган. Анда Салкынай Алимбаеванын камактагы мөөнөтү 24-сентябрга чейин узартыла турганы айтылган.

Белгилей кетсек, Салкынай Алимбаева ушул жылдын 25-майында кармалган. Ага коррупция беренеси боюнча айып тагылганын буга чейин жактоочу Разак Ашимбаев билдирген. Кийин Алимбаеванын баш коргоо чарасы каралып, ал 24-июлга чейин камакка алынган болчу.

Салкынай Алимбаева учурда абакта жаткан Равшан Жээнбековдун жубайы. Равшан Жээнбеков былтыр 23-октябрда "Массалык башаламандык уюштуруу" беренесинин негизинде отузга жакын саясатчы, жарандык активисттер менен чогуу камалган. Учурда ал Бишкектеги №1 тергөө абагында отурат.