"Скутер балонду сүйрөп бара жатып теплоходко урунган". Чолпон-Атадагы кырсык боюнча милиция билдирүү таратты

Бүгүн, 25-июлда Чолпон-Ата шаарындагы пансионаттардын биринде скутердин айдоочусу көлдөгү 3 адамды сүзүп кетип, анын экөө каза болгону тууралуу маалымат чыккан. Ысык-Көл ОИИБи аталган окуя боюнча толук маалымат таратты.

Ага ылайык, 23-июль күнү Ысык-Көл РИИБне Ысык-Көл районунун аймактык ооруканасынын тез жардам бөлүмүнө денесинен оор жаракат алган 3 адам келип түшкөнү тууралуу маалымат берилген. Алардын бири оорукананын жандандыруу бөлүмүндө каза болуп, экөө жандандыруу бөлүмүнө оор абалда жайгаштырылганы айтылган.

Териштирүү иш-чараларынын жүрүшүндө 23-июль күнү саат 16:30 чамасында Чолпон-Ата шаарында жайгашкан эс алуучу жайлардын биринде суу оюн-зоок кызматын көрсөткөн моторлуу кайыктын айдоочусу көлдүн үстүндө жүргөн “Таблетка” балонун сүйрөтүп бара жатып, теплоходко урунганы белгилүү болгон. Натыйжада, үч адам денесинен жаракат алып, оор абалда Чолпон-Ата шаарынын райондук ооруканасына жеткирилген.

Жабыркагандардын экөөсү алган оор жаракаттарынан улам ошол эле түнү оорукананын жандандыруу бөлүмүндө көз жумуп, үчүнчү жабырлануучу хирургия бөлүмүнө жаткырылган.

Ысык-Көл РИИБнин кызматкерлери тарабынан кылмышка шектүү кармалып, алдын ала суракта өз күнөөсүн толугу менен мойнуна алган.

Учурда тийиштүү соттук медициналык экспертизаалар дайындалып, тергөөгө чейинки текшерүү иштери улантылууда.