Астанада автобустун айдоочусу рулда бара жаткан жеринен каза болду

Коңшу Казакстандын Астана шаарында автобус айдоочусу рулда бара жаткан жеринен эс-учун жоготуп, каза болду. Бул тууралуу Казакстандын жергиликтүү басылмалары жазышты.

Маалыматка ылайык, окуя бүгүн, 27-июль күнү саат 10:20лар чамасында болгон. Анда Богенбай батыр көчөсүндө бара жаткан автобустун айдоочусу эс-учун жоготкон. Мындан улам автобус мамыны сүзүп, андан кийин жөө адамдар өтүүчү жолго чыгып токтогон.

Автобустун 1961-жылы туулган айдоочусу ооруканага жеткирилип, өзүнө келбей каза болгон.

Өлүмдүн алдын ала себеби - жүрөктүн токтошу. Жүргүнчүлөрдү ташуудагы айдоочунун тажрыйбасы - 15 жылдан ашык.

Учурда бул боюнча териштирүү иштери жүрүүдө.