"Жеңиш" чокусунда дайынсыз болгон альпинисттерди издөөгө куткаруучулар тартылды

"Жеңиш" чокусун багындыруу үчүн чыгып, дайынсыз болуп жаткан альпинисттерди издөөгө куткаруучулар тартылды. Бул тууралуу бүгүн, 28-июлда Өзгөчө кырдаалдар министрлигинен билдиришти.

Маалымдалгандай, "Жеңиш" чокусун багындыруу үчүн чыгып, дайынсыз болуп жаткан 4 альпинистти издөө үчүн бүгүн Өзгөчө кырдаалдар министрлигинин “Эдельвейс” тоодон куткаруу кошуунунун 7 куткаруучусу, министрликтин Республикалык өзүнчө куткаруу отрядынан 16 куткаруучу тартылды.

Ага ылайык, издөө ишин жүргүзүү боюнча расмий кайрылуу 27-июлда Орусиянын Жарандык коргонуу, өзгөчө кырдаалдар жана табигый кырсыктардын кесепеттерин жоюу министрлигинен келип түшкөн. 4 альпинисттин үчөө – Д.П., С.П., Н.Д. аттуу Орусиянын жарандары, төртүнчүсү Литва өлкөсүнүн жараны.

"Альпинисттер Кыргызстандагы “Аксай-Тревел” туристтик компаниясы менен келишим түзүп, камсыздандыруу менен 11-июлда Ысык-Көл облусундагы лагерге жайгашышкан. Ошол эле күнү алар Жеңиш чокусуна жол тартышып, 19-июлда акыркы жолу 6 миң 900 метр бийиктиктен байланышка чыгышкан. Ал эми 24-июлда спутник байланышы аркылуу туристтерге жардам керектигин билдирген координат келип түшкөн", - деп айтылат маалыматта.

Белгилей кетсек, алынган координаттын негизинде “Аксай-Тревел” компаниясы 24-26-июль күндөрү ижарага алган тик учак менен издөө ишин жүргүзүп, бирок ал жыйынтык берген эмес. Ал эми ӨКМнын куткаруучулары чокуга чыгууда кар көчкү түшүү коркунучун жана башка кооптуу шарттарды эске алып, эрежелерди тыкыр сактоо менен издөө ишин жүгүзүшөт.