"Букмекердик оюнга азгырылып". Казакстанда банктан 1,4 миллион доллар уурдаган кассир кармалды

Казакстанда 600 миллион теңгеден (1,4 миллион доллар) ашык акча уурдаган банк кызматкери кармалды. Бул тууралуу аталган өлкөнүн жергиликтүү басылмалары жазып чыгышты.

Маалыматка караганда, Кызылорда облусунун банк кызматкери 3 жылдан бери банктын кассасынан 1 миллиондон 4 миллион теңгеге чейин уурдап келген. Ал бул аралыкта кассадан 602,9 миллион теңге алууга жетишкен.

Кассирдин кылмышы банктын ячейкасындагы акча каражаттарын текшерүү учурунда 602,9 миллион теңге жетишсиздиги аныкталганда белгилүү болгон. Ошондой эле банк кызматкеринин бардык кылмышы видео камерага түшүп калган.

Сотко чейинки иликтөө иштеринин жүрүшүндө кассирдин 3 жарым жылдан бери букмекердик конторага 158 миллион теңге которгону аныкталган.

Учурда кылмышка шектүү күнөөсүн толугу менен мойнуна алып, убактылуу кармоочу жайга киргизилгени айтылды.