Москвадагы “Кыргызстан” соода-көргөзмө борбору оңдолууда

Москвадагы “Кыргызстан” соода-көргөзмө борбору жакында пайдаланууга берилет. Бул тууралуу президенттин маалымат кызматы бидирди.

Ага ылайык, Москва шаарында жайгашкан (ВДНХ) “Кыргызстан” соода-көргөзмө борборунун имараты толугу менен оңдоп- түзөөдөн өтүүдө.

“Бул жерде, мурдагы союздаш өлкөлөргө таандык павильондор бар. Кыргызстандан башкасы качан эле оңдоп, ар бир мамлекет өздөрүнүн улуттук-маданий борборуна айлантып алышкан.

Мындан бир топ жыл мурда “Кыргызстан” соода-көргөзмө борборун кыргызстандык ишкерлер инвестиция салып оңдоп, кызмат көрсөтүүчү маданий жайга айланткан.

Тилекке каршы, 2016-жылы инвестор менен Кыргыз өкмөтүнүн ортосунда ажырым болуп, кайрадан талкаланып, ушул кезге чейин кароосуз турган”, – деп жазылат маалыматта.

Кошумчалангандай, имаратты президенттин иш башкармалыгына караштуу "Кыргыздипсервис" ишканасы тейлейт. Бул жай Москвада жүргөн кыргызстандыктар чогулган маданий жайга айланат.