Кара-Кулжада өрттөнгөн мектеп: Жаңы мектептин курулушун тездетүү тапшырмасы берилди

Кечээ, 3-августта президенттин Ош облусундагы ыйгарым укуктуу өкүлү Элчибек Жантаев Кара-Кулжа районунун Кызыл-Жар айылында өрттөнгөн Кебек Мамаев атындагы орто мектептен кабар алды.

Облустагы өкүлчүлүктөн билдиргендей, Жантаев өрттөнгөн мектептин жанына курулуп жаткан эки кабаттуу жаңы мектептин имаратын курууну тездетүүнү тиешелүү кызматтарга тапшырды.

Ошондой эле ал жаңы окуу жылында балдардын билим алуусу үзгүлтүккө учурабай тургандыгын белгиледи.

"Бул мектептин курулушун эртерээк бүтүрүү үчүн бардык шарттар түзүлөт. Куруучулардын санын көбөйтүп, жаңы окуу жылына сапаттуу жана кыска мөөнөттө жаңы мектепти пайдаланууга берүүгө аракет кылышыбыз зарыл. Өрттөлгөн мектепти калыбына келтирсе болот, эч ким жабыркабаганына шүгүр келтирип, бардык күчүбүздү жаңы мектеп курууга жумшоо учур талабы. Окуучуларыбыздын билим алуусу үзгүлтүккө учурабайт жана жергиликтүүлөргө кубаныч тартуулаган заманбап билим берүү мекемесин калыбына келтиребиз", - деди Элчибек Жантаев.

Эске салсак, 2-августта Ош облусундагы Кара-Кулжа районуна караштуу Кайың-Талаа айылындагы Кебек Мамаев атындагы орто мектепте өрт чыкканы кабарланган. Аталган мектептин директору Баатырбек Кулеков SUPER.KG порталына окуянын чоо-жайын айтып берген.