Түптөгү селден жүзгө жакын турак үйдүн короосу зыянга учурады

Ысык-Көлдүн Түп районундагы селдин кесепетинен жүзгө жакын турак үйдүн короосу зыянга учурады. Бул тууралуу бүгүн, 8-августта Өзгөчө кырдаалдар министрлигинен билдиришти.

Маалым болгондой, кечээ, 7-августта Түп районунда нөшөрлөгөн жамгырдын кесепетинен кокту-колоттордон чогулган сел суулары айылдарды каптаган.

Каркыра айыл аймагынын Талды-Суу айылында 28, Корумду айылында 40тан ашык, Көөчү айылында 24, жалпысынан болжол менен 92 турак үйдүн короосу, жер төлөсү жана ички чарбалык жолдору, айдоо талааларында сел жүргөнү айтылат.

"Бүгүн, 8-августта аталган айылдарга күч-каражаттар тартылып, тактоо жана табигый кырсыктын кесепеттерин жоюу иштерине чыгышты. Алсак, ӨКМнын Ысык-Көл облустук башкармалыгына караштуу район-шаар бөлүмдөрүнөн 103 куткаруучу иштеп жатат.

Ошондой эле техникалык иштерди аткарууга 1 экскаватор, 1 жүктөгүч, 3 ХОВО, 2 АКУ, мотопомпалар тартылган.

Таң эрте куткаруучулар 5 топко бөлүнүп башкармалыктын башчысы полковник Мирлан Карабаев жетекчилиги менен үймө-үй кыдырып, чалгындоо иштерин жүргүзүүдө.

Куткаруучулар тарабынан турак үйлөрдүн короо-жайлары тазаланып жатат", - деп жазылат маалыматта.

Мындан тышкары, кырсыктын кесепетин жоюуга Каркыра айыл аймагынан 40, Түп ИИБинен 20, райондук администрациясынан 5 адам чыкканы кабарланат.